கொரியாவில் இலங்கைப் பணியாளர்களுக்கு புதிய தொழில் வாய்ப்புக்களைத் திறப்பதற்கும் கொரிய வேலை வாய்ப்புகளை அதிகரிப்பதற்கும் தேவையான நடவடிக்கைகள் எடுக்கப்படும் என கொரிய தொழில் மற்றும் வேலைவாய்ப்பு அமைச்சர் லீ ஜங்-சிக் உறுதியளித்துள்ளார்.
தொழிலாளர் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்காரவின் அழைப்பின் பேரில், கொரிய அரசாங்கத்தின் தொழிலாளர் மற்றும் வேலைவாய்ப்பு அமைச்சர் லீ ஜங்-சிக் இரண்டு நாள் உத்தியோகபூர்வ விஜயமாக நேற்று (14) காலை இலங்கை வந்தடைந்தார்.
இரு அமைச்சர்களுக்குமிடையிலான உத்தியோகபூர்வ சந்திப்பு, தொழில் மற்றும் வெளிநாட்டு வேலைவாய்ப்பு அமைச்சில் நேற்று (14) இடம்பெற்றதுடன், இலங்கைத் தொழிலாளர்களுக்கு அதிக வேலை வாய்ப்புகளைப் பெற்றுக்கொடுக்க தேவையான நடவடிக்கைகளை மேற்கொள்வது குறித்தும் நீண்ட கலந்துரையாடல் இடம்பெற்றுள்ளது.
இலங்கைத் தொழிலாளர்களுக்கு ஆடைத் துறை, தாதியர் துறை போன்ற புதிய தொழில் வாய்ப்புக்களைத் திறக்குமாறு அமைச்சர் மனுஷ நாணயக்கார கோரிக்கை விடுத்ததுடன், கொரிய தொழில் மற்றும் வேலைவாய்ப்பு அமைச்சரிடமிருந்து சாதகமான பதிலைப் பெற்றுள்ளார்.
கொரிய கப்பல் நிர்மாணத்துறையில் தொழில்களுக்கு பெருமளவிலான பணியாளர்கள் தேவைப்படுவதாகவும், இலங்கை பயிற்சி பெற்ற தொழிலாளர்களுக்கு அதிக வாய்ப்புகள் திறக்கப்பட்டுள்ளதாகவும் இதன்போது கலந்துரையாடப்பட்டது.