வாகன விபத்தில் மூவர் பலி

மங்குளம் – பனிச்சம்குளம் பகுதியில் இன்று அதிகாலை இடம்பெற்ற வாகன விபத்தில் 3 பேர் உயிரிழந்தனர்.

இந்த விபத்தில் 8 பேர் காயமடைந்துள்ள நிலையில், வைத்தியசாலைகளில் அனுமதிக்கப்பட்டுள்ளதாக பொலிஸ் ஊடக பிரிவு தெரிவித்துள்ளது.

கொழும்பில் இருந்து யாழ்ப்பாணம் நோக்கி பயணித்த வேன் ஒன்று, வீதியில் நிறுத்தப்பட்டிருந்த லொறி ஒன்றில் மோதுண்டதுடன், குறித்த லொறி அதன் முன்னால் இருந்த மற்றுமொரு லொறியுடன் மோதுண்டு விபத்துக்குள்ளானதாக தெரிவிக்கப்படுகின்றது.

லொறிக்கு பின்னால் நின்றிருந்த ஒருவரும் வேனில் பயணித்த இருவரும் காயமடைந்த நிலையில், மாங்குளம் வைத்தியசாலையில் அனுமதிக்கப்பட்ட பின்னர் அவர்கள் சிகிச்சை பலனின்றி உயிரிழந்தனர்.

அதேநேரம், 3 பெண்கள் உள்ளிட்ட 8 பேர் கிளிநொச்சி மற்றும் மாங்குளம் வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.