யாழில் இளைஞன் படுகொலை: நால்வர் கைது

யாழ்ப்பாணம் – வட்டுக்கோட்டை பகுதியில் வாள்வெட்டு சம்பவம் தொடர்பில் கைது செய்யப்பட்ட நான்கு சந்தேகநபர்களும் இன்று நீதிமன்றில் முன்னிலைப்படுத்தப்படவுள்ளனர்.

கைது செய்யப்பட்ட நபர்கள் வட்டுக்கோட்டை மற்றும் அராலி பகுதிகளை சேர்ந்த 37, 32, 25 மற்றும் 22 வயதுடையவர்கள் என பொலிஸார் தெரிவித்தனர்.

அவர்களிடமிருந்து இருந்து இரண்டு மோட்டார் சைக்கிள்களை பொலிஸார் கைப்பற்றியுள்ளனர்.

யாழ்ப்பாணம் – வட்டுக்கோட்டை பகுதியில் மோட்டார் சைக்கிளில் பயணித்துக்கொண்டிருந்த தம்பதியரை கடத்திச்சென்றவர்கள், கணவரைகூர்மையான ஆயுதங்களால் வெட்டி கொலை செய்துள்ளனர்.

வட்டுக்கோட்டை பகுதியில் கணவனும் மனைவியும் மோட்டார் சைக்கிளில் பயணித்துக் கொண்டிருந்தபோது கணவருடன் ஏற்கனவே கருத்து முரண்பாட்டைக் கொண்டிருந்த சிலர் காரில் அவர்களை பின்தொடர்ந்துள்ளனர்.

இதனையறிந்த கணவன், மோட்டார் சைக்கிளை திருப்பி வேறு திசையில் பயணத்தை தொடர்ந்துள்ளார்.

எனினும் காரில் பின்தொடர்ந்து வந்தவர்கள் தம்பதியை மோட்டார் சைக்கிளுடன் கடத்திச்சென்று மனைவியை யாழ்ப்பாணம் சித்தங்கேணியில் இறக்கி விட்டுள்ளதாக தெரிவிக்கப்பட்டுள்ளது.

கடத்தப்பட்டவர் கூரிய ஆயுதங்களால் தாக்கப்பட்டு கடும் காயங்களுடன் கோட்டைக்காடு வைத்தியசாலைக்கு அருகில் கைவிடப்பட்டிருந்தாக பொலிஸார் தெரிவித்தனர்.

காயமடைந்தவர் வட்டுக்கோட்டை வைத்தியசாலையில் இருந்து மேலதிக சிகிச்சைகளுக்காக யாழ்ப்பாணம் போதனா வைத்தியசாலைக்கு மாற்றப்பட்ட நிலையில் சிகிச்சை பலனின்றி உயிரிழந்தார்.