தந்தை மற்றும் தாயால் கொடூரமான முறையில் தாக்கப்பட்டு ஹட்டன் ரயில் நிலையத்தில் தங்கியிருந்த 15 வயதுடைய பாடசாலை மாணவன் ஒருவர் ஹட்டன் பொலிஸாரினால் மீட்கப்பட்டுள்ளார்.
கொழும்பு, கோட்டையில் இருந்து பதுளை நோக்கிச் சென்ற இரவு அஞ்சல் ரயிலில் பயணித்த அனுராதபுரம் பகுதியைச் சேர்ந்த மொஹமட் அம்பர் என்ற பாடசாலை மாணவன் ஹட்டன் ரயில் நிலையத்திலிருந்து இன்று (19) அதிகாலையில் இறங்கி காத்திருந்தார்.
இதன்போதே அவர் மீட்கப்பட்டதாக பொலிஸார் தெரிவித்துள்ளனர்.
தனது பெற்றோர் அனுராதபுரத்தில் வசிப்பவர்கள் என்றும், தனது குடும்பத்தில் ஒரு மூத்த சகோதரனும் ஒரு சகோதரியும் இருப்பதாகவும் குறித்த பாடசாலை மாணவன் கூறியுள்ளார்.
பாணந்துறை பிரதேசத்திலுள்ள பாட்டியின் வீட்டில் தங்கியிருந்த போதே பாடசாலைக் கல்வியைப் பெற்றதாகவும், 10 ஆம் ஆண்டு வரை கல்வி கற்கும் போது பாடசாலையிலிருந்து இடைவிலக்கப்பட்டதாகவும் அவர் தெரிவித்துள்ளார்.
அனுராதபுரத்தில் உள்ள தனது வீட்டிலும், பாணந்துறையில் உள்ள தனது பாட்டி வீட்டிலும் தங்கியிருந்த போது, தனது தந்தை வந்து தன்னை வீட்டை விட்டு வெளியேறுமாறு வற்புறுத்தி கொடூரமாக தாக்கியதாகவும், தந்தையின் சித்திரவதைக்கு முகங்கொடுத்து, அனுராதபுரத்தில் இருந்து வந்ததாகவும் சிறுவன் குறிப்பிட்டுள்ளார்.
தாய், தந்தையின் சித்திரவதையால் வீடு திரும்ப முடியாமல் தவிப்பதாகவும் அவர் கூறியுள்ளார்.
பொலிஸாரால் மீட்கப்பட்ட குறித்த பாடசாலை மாணவனின் முதுகில் பல காயங்கள் உள்ளதால் அவரை டிக்கோயா வைத்தியசாலையில் உள்ள சட்ட வைத்தியரிடம் அனுப்பி வைக்கவும், பின்னர் இது தொடர்பான மேலதிக நடவடிக்கையினை முன்னெடுக்கவும் ஹட்டன் பொலிஸார் நடவடிக்கை எடுத்திருந்தனர்.