நுரைச்சோலை அனல்மின்நிலையத்தில் பழுதடைந்துள்ள மூன்றாவது மின் பிறப்பாக்கியை மீள ஆரம்பிக்க சுமார் 12 நாட்கள் ஆகும் என இலங்கை மின்சார சபை தெரிவித்துள்ளது.
இயந்திரத்தின் கொதிகலனில் உள்ள நீர் குழாய் உடைந்துள்ளதாக அதன் பொது முகாமையாளர் ரொஹான் செனவிரத்ன தெரிவித்தார்.
அதிக வெப்பத்தால் இயந்திரத்தை பழுது பார்க்க முடியாத நிலை காணப்படுவதாக அவர் கூறினார்.
மூன்றாவது ஜெனரேட்டரின் பராமரிப்பு பணிகள் எதிர்வரும் ஏப்ரல் மாதம் மேற்கொள்ள திட்டமிடப்பட்டுள்ளதாகவும், மின்சார சபைக்கு சொந்தமான டீசல் மற்றும் எரிபொருள் உற்பத்தி நிலையங்கள் மூலம் மக்களுக்கு தொடர்ந்து மின்சாரம் வழங்க நடவடிக்கை எடுப்பதாகவும் மின்சாரம் மற்றும் எரிசக்தி அமைச்சர் கஞ்சன விஜேசேகர தெரிவித்தார்.
இதனால் மின்வெட்டு அமுலாகாது என அவர் மேலும் தெரிவித்தார்.