பெண் ஒருவருக்கு பாலியல் தொந்தரவு மேற்கொண்ட குற்றச்சாட்டின் பேரில், ஊழல் எதிர்ப்பு முன்னணியின் செயற்பாட்டு பணிப்பாளர் நாமல் குமாரவை வரக்காபொல பொலிஸார் கைது செய்துள்ளனர்.
நாமல் குமார ஒரு கதிரையில் கட்டப்பட்டிருப்பதைக் காட்டும் பல படங்கள் மற்றும் காணொளிகள் சமூக ஊடகங்களில் பகிரப்பட்டு வருகின்றன.
அதே நேரத்தில் அவர் தன்னை பாலியல் வன்புணர்வு செய்ததாக பெண்ணொருவர் குற்றம் சாட்டுவதையும் அந்த காணொளிகளில் அவதானிக்க முடிகிறது.
இந்த நிலையில், பெண் ஒருவர் வரக்காபொல காவல்நிலையத்தில் செய்த முறைப்பாட்டின் அடிப்படையில் நாமல் குமார கைது செய்யப்பட்டு வரக்காபொல வைத்தியசாலையில் அனுமதிக்கப்பட்டுள்ளதாக பொலிஸார் தெரிவிக்கின்றனர்.
நாமல்குமார தனது வீட்டிற்குள் வைத்து தன்னை பாலியல் வன்புணர்வுக்கு உட்படுத்தியதாக குறித்த பெண் தமது முறைப்பாட்டில் தெரிவித்துள்ளார்.
பின்னர், அவரை வீட்டில் இருந்து வெளியே இழுத்து வந்து மரத்தில் கட்டி வைத்து தாக்கியதாகவும் குறித்த பெண் கூறுகிறார். மேலும் நான்கு பேரும் நாமலை தாக்கியுள்ளனர் என்று பொலிஸ் தெரிவித்துள்ளது.
நாமல் குமாரவினால் பாலியல் வன்புணர்வுக்கு உள்ளானதாக கூறப்படும் குறித்த பெண் வரக்காபொல வைத்தியசாலையில் அனுமதிக்கப்பட்டு, பின்னர் அங்கிருந்து வெளியேறியுள்ளார்.
இதேவேளை, வாரியகொட பகுதிக்கு சட்டவிரோத மதுபானம் விற்பனை செய்யும் வீடொன்று தொடர்பில் தகவல் சேகரிப்பதற்காக தனது மனைவியுடன் சென்றபோது குறித்த பெண் உள்ளிட்ட குழுவினரால் தான் வரக்காபொலவில் தாக்கப்பட்டதாக நாமல் குமார வரக்காபொல பொலிஸ் நிலையத்தில் முறைப்பாடு செய்துள்ளார்.
மேலும், பிரதேசத்திற்குப் பொறுப்பான பிரதிப் காவல்துறைமா அதிபர் மற்றும் வரக்காபொல பொலிஸ் பொறுப்பதிகாரி ஆகியோர், அப்பகுதிக்குள் இடம்பெறும் சட்டவிரோதச் செயற்பாடுகள் தொடர்பான தகவல்களைத் திரட்டுமாறு தன்னிடம் கோரியதாக அவர் தெரிவித்துள்ளார்.
எவ்வாறாயினும், நாமல் குமார ஒருபோதும் காவல்துறையினருக்கு எந்தவிதமான தகவலையும் வழங்கவில்லை என பொலிஸார் தெரிவித்தனர்.
இதேவேளை, நாமல் குமார தாக்கப்பட்டதாக கூறப்படும் சம்பவம் தொடர்பில் சந்தேகநபரான பெண் உட்பட ஐவரை பொலிஸார் கைது செய்துள்ளனர்.
சந்தேகநபர்கள் நேற்று (02) வரக்காபொல நீதிமன்றில் முன்னிலைப்படுத்தப்பட்டதன் பின்னர் பிணையில் விடுவிக்கப்பட்டனர்.