வவுனியா பொது வைத்தியசாலையில் சிசு உயிரிழந்த சம்பவம் தொடர்பில் விசாரணை நடத்துமாறு கோரி பெற்றோர்களும் பிரதேசவாசிகளும் வவுனியா பொது வைத்தியசாலையின் பிரதான வாயிலுக்கு முன்பாக நேற்று (21) மாலை ஆர்ப்பாட்டத்தில் ஈடுபட்டனர்.
வவுனியா வைத்தியசாலையின் கர்ப்பகால பிரிவு வைத்தியர்கள் மற்றும் ஊழியர்களின் கவனக்குறைவால் குழந்தை உயிரிழந்துள்ளதாக போராட்டத்தில் ஈடுபட்டவர்கள் தெரிவிக்கின்றனர்.
குழந்தையின் தாய் பிரசவ வலியால் துடித்தபோது, அதை சரியாக கவனிக்காததால் குழந்தை இறந்துவிட்டதாகவும், குழந்தையின் மரணம் கொலை என்றும் கூறி போராட்டம் முன்னெடுக்கப்பட்டது.
பல வருடங்களாக குழந்தை இல்லாமல் இருந்த தம்பதியரின் முதல் குழந்தை உயிரிழந்ததை பெற்றோர்களால் தாங்கிக் கொள்ள முடியவில்லை என எமது பிரதேச செய்தியாளர் குறிப்பிட்டுள்ளார்.
வவுனியா பொது வைத்தியசாலையில் உள்ளக விசாரணை நடத்தப்படும் என கூறப்பட்டாலும் அது தொடர்பான விசாரணைகள் பாரபட்சமின்றி நடைபெறுவதால் சுகாதார அமைச்சர் தலையிட்டு சம்பவம் தொடர்பில் விசாரணை நடத்தி நீதி வழங்க வேண்டும் என ஆர்ப்பாட்டக்காரர்கள் கோரிக்கை விடுத்துள்ளனர்.
அத்துடன், சடலத்தின் பிரேத பரிசோதனையை வவுனியா வைத்தியசாலையில் நடத்தக்கூடாது எனவும், பிரேத பரிசோதனையை கொழும்பு தேசிய வைத்தியசாலையிலோ அல்லது வேறு இடத்திலோ நடத்துமாறும் ஆர்ப்பாட்டக்காரர்கள் கோரிக்கை விடுத்துள்ளனர்.
சம்பவம் தொடர்பான மேலதிக விசாரணைகளை வவுனியா பொலிஸார் மேற்கொண்டு வருகின்றனர்.