அனுராதபுரம் – பாதெனிய பிரதான வீதியில் இடம்பெற்ற வாகன விபத்தில் பெண் ஒருவர் உயிரிழந்துள்ளார்.
தலாவ பொலிஸ் பிரிவிற்குட்பட்ட மீரிகம பகுதியில் நேற்று (04) இரவு இரண்டு மோட்டார் சைக்கிள்கள் ஒன்றுடன் ஒன்று மோதியதில் இந்த விபத்து இடம்பெற்றுள்ளதாக பொலிஸார் தெரிவித்தனர்.
இந்த வாகன விபத்தில் பெண் ஒருவர் உயிரிழந்துள்ளதுடன் மேலும் மூவர் படுகாயமடைந்த நிலையில் அனுராதபுரம் போதனா வைத்தியசாலையில் அனுமதிக்கப்பட்டுள்ளனர்.
கல்கமுவ, கிரிபாவ பகுதியைச் சேர்ந்த பெண் ஒருவரே இவ்வாறு உயிரிழந்துள்ளதாக பொலிஸார் தெரிவித்தனர்.
தலாவ பகுதியில் இருந்து அனுராதபுரம் நோக்கி பயணித்த மோட்டார் சைக்கிளும் அனுராதபுரத்திலிருந்து கல்கமுவ நோக்கி பயணித்த மோட்டார் சைக்கிளும் நேருக்கு நேர் மோதியதில் இந்த விபத்து இடம்பெற்றுள்ளதாக எமது செய்தியாளர் தெரிவித்தார்.
விபத்தில் சிக்கிய இரு மோட்டார் சைக்கிள்களும் பலத்த சேதங்களுக்கு உள்ளாகியுள்ளதுடன், சம்பவம் தொடர்பான மேலதிக விசாரணைகளை தலாவ பொலிஸார் மேற்கொண்டு வருகின்றனர்.