மதுரங்குளி ஏ.டி.எம் கொள்ளை தொடர்பில் மூவர் கைது செய்யப்பட்டுள்ளதாக மதுரங்குளி பொலிஸார் தெரிவித்தனர்.
புத்தளம் – மதுரங்குளியில் ATM இயந்திரம் உடைக்கப்பட்டு10 மில்லியன் ரூபாவுக்கும் அதிக பணத்தை கொள்ளையிட்ட மூன்று சந்தேகநபர்களே இவ்வாறு கைது செய்யப்பட்டுள்ளனர்.
குறித்த இயந்திரம் கடந்த 8 ஆம் திகதி உடைக்கப்பட்டு, ஒரு கோடியே 5 இலட்சத்து 49 ஆயிரம் ரூபா பணம் கொள்ளையிடப்பட்டதாக பொலிஸ் ஊடகப் பிரிவு தெரிவிக்கின்றது.
மதுரங்குளி பொலிஸார் மற்றும் புத்தளம் குற்றத் தடுப்பு பிரிவினர் ஆகியோரினால் விசாரணைகள் ஆரம்பிக்கப்பட்டிருந்தன.
இந்த நிலையில், அநுராதபுரம் பொலிஸ் பிரிவிற்குட்பட்ட பகுதியில் வைத்து குற்றத் தடுப்பு பிரிவினரால் சந்தேகநபர்கள் நேற்று கைது செய்யப்பட்டுள்ளனர்.
கைது செய்யப்பட்ட சந்தேகநபர்கள் வசமிருந்து 92 இலட்சத்து 77 ஆயிரம் ரூபா பணம் கைப்பற்றப்பட்டுள்ளதாக பொலிஸார் தெரிவிக்கின்றனர்.
கல்கமுவ, வரெல்லாகம மற்றும் அநுராதபுரம் ஆகிய பகுதிகளைச் சேர்ந்த 28, 32 மற்றும் 35 வயதுடையவர்களே இவ்வாறு கைது செய்யப்பட்டுள்ளனர்.
ATM இயந்திரத்திற்கு பணத்தை வைப்பிலிட்டு, மீண்டும் வங்கிக்கு கொண்டு செல்லும் பணிகளை மேற்கொள்ளும் தனியார் பாதுகாப்பு நிறுவனத்தில் பணியாற்றும் இருவர், கைது செய்யப்பட்டவர்களில் அடங்குவதாக தெரிய வருகின்றது.
பணத்தை கொள்ளையிடுவதற்கு பயன்படுத்திய பொருட்களுடன் சந்தேகநபர்கள் மதுரங்குளி பொலிஸாரிடம் ஒப்படைக்கப்பட்டுள்ளனர்.
சந்தேகநபர்களை நீதிமன்றத்தில் முன்னிலைப்படுத்த பொலிஸார் நடவடிக்கை எடுத்து வருகின்றனர்.