தலவாக்கலை கிரேட் வெஸ்டர்ன் மலை உச்சியில் மர்மமான முறையில் சடலமாக மீட்கப்பட்ட பெண் அடையாளம் காணப்பட்டுள்ளதாக லிந்துலை பொலிஸாரினால் தெரியவந்துள்ளது.
நேற்று (22) அவரது கணவர் மற்றும் உறவினர்கள் அவரை அடையாளம் காட்டியதை அடுத்து, நுவரெலியா நீதவான் உத்தரவின் பேரில் சடலம் உறவினர்களிடம் ஒப்படைக்கப்பட்டதாக லிந்துலை பொலிஸார் தெரிவித்தனர்.
பெண்ணின் சடலத்தை அடையாளம் காண்பதற்காக லிந்துலை பொலிஸார் குறித்த பெண்ணின் கைரேகைகளை பெற்று கைரேகை பதிவு அலுவலகத்திற்கு அனுப்பிவைத்ததையடுத்து அவரது உறவினர்களால் அடையாளம் காண முடிந்துள்ளது.
இதன்படி உயிரிழந்தவர் கிரிந்த பிரதேசத்தை சேர்ந்த 36 வயதுடைய பெண் என தெரியவந்துள்ளது.
இந்த பெண் கணவனை பிரிந்து வேறு ஒருவருடன் நெருங்கிய உறவை பேணி வந்ததாக கூறப்படுகிறது.
சட்டப்படியான திருமணத்தில் அவருக்கு மூன்று பிள்ளைகள் இருப்பதாக தற்போதைய விசாரணைகளில் லிந்துலை பொலிஸார் தெரிவித்துள்ளனர்.
இறந்த பெண்ணின் கையில் இருந்த மதுசங்க என்ற பச்சையை கண்டு கணவர் சடலத்தை அடையாளம் கண்டுள்ளார்.
இந்த பெண்ணுடன் கிரேட் வெஸ்டர்ன் மலைக்கு வந்த நபர்களை கைது செய்ய பொலிஸார் பல திணைக்களங்கள் ஊடாக மேலதிக விசாரணைகளை மேற்கொண்டு வருகின்றனர்.
சடலத்தை பிரேத பரிசோதனை செய்த நுவரெலியா மாவட்ட பொது வைத்தியசாலையின் சட்ட வைத்தியர் இது கொலை என சந்தேகம் வெளியிட்டிருந்தார்.
தடயவியல் மருத்துவர் இறந்த பெண்ணின் உடல் உறுப்புகளை அரசு ஆய்வாளருக்கு அனுப்பியுள்ளார்.