பாணந்துறை வடக்கு பொலிஸாரால் கைது செய்யப்பட்ட பெண் ஒருவர் பொலிஸ் காவலில் வைக்கப்பட்டிருந்த நிலையில் உயிரிழந்த சம்பவம் தொடர்பில் விசாரணைகள் ஆரம்பிக்கப்பட்டுள்ளன.
நேற்று மாலை 6.30 மணியளவில் பாணந்துறை வடக்கு பொலிஸ் உத்தியோகத்தர்கள் குழுவொன்று பாணந்துறை தெல்கஹவத்த பகுதியில் உள்ள வீடொன்றில் முன்னெடுக்கப்ப்ட சட்டவிரோத மதுபான உற்பத்தியை சுற்றிவளைப்பதற்காக வந்துள்ளனர்.
இதன்போது 51 வயதுடைய பெண் ஒருவர் கைது செய்யப்பட்டு பொலிஸ் நிலையத்துக்கு அழைத்துச் செல்லப்பட்டுள்ளார்.
அந்த வீட்டின் முன் வசிக்கும் குறித்த பெண்ணின் சகோதரர், சகோதரிக்கு உடல்நிலை சரியில்லாததால் அவரை அழைத்துச் செல்ல வேண்டாம் என கேட்டுள்ளார்.
எவ்வாறாயினும், பாணந்துறை வடக்கு பொலிஸ் உத்தியோகத்தர்கள் 4 பேர் குறித்த பெண்ணை முச்சக்கரவண்டியில் ஏற்றிக்கொண்டு சென்றுள்ளதாக தெரியவந்துள்ளது.
பின்னர் முச்சக்கரவண்டியில் சென்ற பெண்ணின் உடல்நிலை மோசமடைந்ததாகவும், எனினும், பொலிஸ் அதிகாரிகள் அந்த பெண்ணை பொலிஸ் நிலையத்திற்கு அழைத்துச் சென்றதாகவும் கூறப்படுகிறது.
அப்போது அந்த பெண்ணின் மருமகன்கள் இருவர், பொலிஸ் முச்சக்கரவண்டியை பின்தொடந்து சென்றுள்ளதுடன், பொலிஸ் நிலையத்துக்கு அருகே வந்ததும் குறித்த பெண்ணின் உடல்நிலை சரியில்லாததால் மருத்துவமனைக்கு அழைத்து செல்லுமாறு அதிகாரிகள் கூறியதாக தெரிவிக்கப்படுகிறது.
அதன் பின்னர், குறித்த பெண் அவரது மருமகன்களுடன் மற்றுமொரு முச்சக்கர வண்டியில் வைத்தியசாலைக்கு அழைத்து செல்லப்பட்ட நிலையில் உயிரிழந்ததாக தெரிவிக்கப்படுகிறது.