மூன்று ஆண்டுகளாக தனது 10 வயது மகனுடன் வீட்டை விட்டு வெளியே வராமல் தங்கியிருந்த பெண்ணை மீட்கும் பணியில் இந்திய பாதுகாப்புப் படையினர் அண்மையில் ஈடுபட்டுள்ளனர்.
உலகளாவிய கொவிட் தொற்றுநோயிலிருந்து தம்மை பாதுகாத்துக் கொள்வதற்காக குறித்த பெண் தனது மகனுடன் மூன்று வருடங்களாக வீட்டை விட்டு வெளியேறாமல் அங்கு வசித்து வந்துள்ளதாக கூறப்படுகிறது.
2020 ஆம் ஆண்டில் இந்தியா முடக்கப்பட்ட நிலையில், சம்பந்தப்பட்ட பெண் வீட்டிற்குள்ளேயே இருக்க தேவையான ஏற்பாடுகளை செய்துள்ளார்.
மேலும் கட்டுப்பாடுகளைத் தளர்த்த இந்திய அரசாங்கம் முடிவு செய்ததை அடுத்து, அவரது கணவர் வேலைக்காக வீட்டை விட்டு வெளியேறியதாகக் கூறப்படுகிறது.
எனினும் வீட்டை விட்டு வெளியேறிய கணவரை மீண்டும் வீட்டிற்குள் வர அவர் அனுமதிக்காமல் இருந்துள்ளதாக கூறப்படுகிறது.
இதனால் கணவர் உறவினர் வீட்டில் சிறிது காலம் தங்கிவிட்டு வாடகை வீட்டில் குடியேறியுள்ளார்.
தனியார் நிறுவனத்தில் பொறியாளராக இருக்கும் கணவர், வீட்டுக்குள் இருந்த மனைவி மற்றும் குழந்தையின் நலம் விசாரித்துள்ளார்.
அவர் தனது மனைவி மற்றும் மகனுடன் வீடியோ கால் மூலம் தான் தொடர்பில் இருப்பதாகவும், வீட்டின் மாத வாடகை உட்பட கட்டணங்களை செலுத்து. மளிகை, காய்கறிகள் வாங்கி வந்து பிரதான கதவுக்கு வெளியே வைத்துவிட்டு சென்றதாகவும் கூறியுள்ளார்.
எனினும் 33 வயதான கணவன், தனது மனைவியின் செய்கையை பொறுத்துக் கொள்ள முடியாத நிலையில், இது தொடர்பில் அண்மையில் பொலிஸாருக்கு அறிவித்ததாகவும், பின்னர் பொலிஸார் வந்து அவர்களை வீட்டை விட்டு வெளியே அழைத்துச் சென்றுள்ளதாகவும் இந்திய ஊடகங்கள் செய்தி வெளியிட்டுள்ளன.
ஏழு வயதில் வீட்டிற்குள் நுழைந்த சிறுவனுக்கு மூன்று வருடங்கள் கழித்து வெளியே வரும் போது அவருக்கு 10 வயது என்றும், அதற்குள் அவனது தலைமுடி தோள்பட்டை அளவிற்கு வளர்ந்திருந்ததாகவும் தெரிவிக்கப்படுகிறது.
வீட்டை விட்டு வெளியே வந்த சிறுவனும் அவனது தாயும் உடனடியாக சக்கர்பூரில் உள்ள அரசு மருத்துவமனையில் அனுமதிக்கப்பட்டனர்.
அவர்கள் வசித்த வீடு அசுத்தமான நிலையில் இருப்பதாகவும், இன்னும் சில நாட்கள் அந்த வீட்டில் தங்கினால் அசம்பாவிதம் நடக்கலாம் என்றும் பொலிஸ் உயர் அதிகாரிகள் தெரிவித்துள்ளனர்.
