மக்கள் தங்கள் சொந்த சுமைகளையும், நாட்டை அழிக்கும் அரசியல்வாதிகளின் சுமைகளையும் சுமக்க வேண்டிய நிலை ஏற்பட்டுள்ளதாக எதிர்க்கட்சித் தலைவர் சஜித் பிரேமதாஸ நேற்று (23) தெரிவித்தார்.
ஜனாதிபதி ரணசிங்க பிரேமதாஸவின் 98 ஆவது பிறந்த தினத்தை முன்னிட்டு நடத்தப்பட்ட நிகழ்வில் கலந்து கொண்ட போதே அவர் இதனைத் தெரிவித்தார்.
மக்களின் துன்பங்களை புரிந்து கொள்ளாத அரசாங்கம் மக்களின் உயிருடன் விளையாடிக் கொண்டிருக்கிறது.
நாட்டின் ஆட்சியாளர்கள் மக்கள் படும் துன்பங்கள் குறித்து பொறுப்பற்றவர்களாகவே செயற்படுகின்றனர்.
இலக்குகளை அடையும் ஒரு வேலைத்திட்டத்தையே கொண்டுள்ள ஐக்கிய மக்கள் சக்தி, அதற்காக அர்ப்பணிப்புடன் செயற்படுகிறது.
அரசாங்கத்திடமிருந்து மக்கள் தீர்வுகளை எதிர்பார்க்கிறார்களேயன்றி, தீர்க்க முடியாத குறைகளை எதிர்பார்க்கவில்லை.
இருந்தபோதிலும், இரண்டு வருட ஆட்சியின் கீழ் மக்கள் அரசியல் நாடகங்களை மட்டுமே மரபுரிமையாக பெற்றுள்ளனர்.
நாட்டின் இரு முனைகளிலும் எரியும் தீபம் போல இரண்டு யுத்தங்கள் நடந்த நாட்டையே பொறுப்பேற்ற ரணசிங்க பிரேமதாஸ அரசாங்கம், அத்தகைய காலத்திலும் இயலாமை, முடியாமை பற்றி பேசாமல் செயற்பட்டது.
செயற்பட இயலாமை குறித்து குறை கூறாத பிரேமதாஸ, மாறாக எவ்வாறு செயற்பட வேண்டும் என்பதை காட்டினார்.
நாட்டின் பிரச்சினைகளை தீர்ப்பதாக கூறி ஆட்சிக்கு வந்த ஆட்சியாளர்கள், முழு நாடும் இன்னல்களில் மூழ்கிய நிலையில் இருந்தாலும், பொது மக்கள் வரிசையில் நின்று கொண்டிருந்த போதிலும், குளிரூட்டி இயந்திரங்களை வைத்துக் கொண்டு யோகா செய்து கொண்டுள்ளனர்.
இந்த அரசாங்கம் மக்கள் படும் துன்பங்களை மூடி மறைத்தேனும் தமது இருப்பை பலப்படுத்தவே முயற்சிப்பதாக அவர் மேலும் தெரிவித்தார்.